Last Updated on: 8th May 2023, 10:56 am
சென்னை: 12ம் வகுப்பு பொதுத்தேர்வு முடிவுகள் வெளியானது. சென்னை கோட்டூர்புரம் அண்ணா நூற்றாண்டு நூலகத்தில் தேர்வு முடிவுகளை அமைச்சர் அன்பில் மகேஸ் வெளியிட்டார். www.tnresults.nic.in, dge.tn.gov.in, dge2.tn.nic.in- ல் தேர்வு முடிவுகளை அறிந்து கொள்ளலாம். 12-ம் வகுப்பு பொதுத்தேர்வை எழுத 8.65 லட்சம் பேர் பதிவு செய்திருந்த நிலையில் 8.17 லட்சம் பேர் தேர்வு எழுதினர்.
பிளஸ் 2 தேர்வில் 7.55 லட்சம் மாணவர்கள் தேர்ச்சி:
பிளஸ் 2 தேர்வு எழுதிய 8.03 லட்சம் பேரில் 7.55 லட்சம் மாணவர்கள் தேர்ச்சி பெற்றனர். பிளஸ் 2 பொதுத் தேர்வில் மாணவிகள் 4,05,753 பேரும், மாணவர்கள் 3,49,697 பேரும் தேர்ச்சி பெற்றிருக்கின்றனர். பிளஸ் 2 தேர்வில் 94.03% பேர் தேர்ச்சி பெற்றுள்ளனர்.
மாணவர்களைவிட மாணவிகள் அதிகளவில் தேர்ச்சி:
மாணவிகள் 96.38%, மாணவர்கள் 91.45% தேர்ச்சி அடைந்திருப்பதாக அமைச்சர் அன்பில் மகேஷ் பொய்யாமொழி தெரிவித்துள்ளார். மூன்றாம் பாலினத்தவர் 1 (100.00%) தேர்ச்சி அடைந்துள்ளார். மாணவர்களைவிட மாணவிகள் 4.93% அதிகம் தேர்ச்சி பெற்றுள்ளனர்.
விருதுநகர் மாவட்டம் முதலிடம்:
பிளஸ் 2 பொதுத்தேர்வு தேர்ச்சி விகிதத்தில் விருதுநகர் மாவட்டம் முதலிடம் பெற்றுள்ளது. விருதுநகர் மாவட்டத்தில் 97.85 சதவீதம் பேர் தேர்ச்சி பெற்றுள்ளனர். 97.79 சதவீதம் தேர்ச்சியுடன் திருப்பூர் மாவட்டம் 2-ம் இடம், 97.59 சதவீதம் தேர்ச்சியுடன் பெரம்பலூர் மாவட்டம் 3-ம் இடம் பிடித்தது. 87.30 சதவீதம் தேர்ச்சி பெற்று ராணிப்பேட்டை மாவட்டம் கடைசி இடத்தை பிடித்துள்ளது.
கடந்த ஆண்டைவிட தேர்ச்சி சதவீதம் அதிகம்:
பிளஸ் 2 பொதுத்தேர்வில் கடந்த ஆண்டைவிட இந்த ஆண்டு தேர்ச்சி சதவீதம் அதிகரித்துள்ளது. கடந்த ஆண்டு 93.76% பேர் தேர்ச்சி பெற்ற நிலையில் இந்த ஆண்டு 94.03% பேர் தேர்ச்சி பெற்றிருப்பதாக அமைச்சர் அன்பில் மகேஸ் தெரிவித்துள்ளார்.
பள்ளிகள் வகைப்பாடு வாரியாக தேர்ச்சி விகிதம்:
பிளஸ் 2 பொதுத்தேர்வில் அரசுப் பள்ளிகளில் 89.80% பேர் தேர்ச்சி பெற்றுள்ளனர். அரசு உதவி பெறும் பள்ளிகள் – 95.99%, தனியார் சுயநிதி பள்ளிகள் – 99.08% பேர் தேர்ச்சி பெற்றுள்ளது. இரு பாலர் பள்ளிகள் – 94.39%, பெண்கள் பள்ளிகள் 96.04%, ஆண்கள் பள்ளிகள் 87.79% பேர் தேர்ச்சி பெற்றுள்ளனர்.
பாட வாரியாக 100 சதவீத தேர்ச்சி:
பிளஸ் 2 பொதுத்தேர்வில் தமிழ் பாடத்தில் 2 மாணவர்கள் 200-க்கு 200 மதிப்பெண் பெற்றனர். ஆங்கிலப் பாடத்தில் 15 மாணவர்கள் 200-க்கு 200 மதிப்பெண் பெற்றனர். கணக்குப்பதிவியலில் அதிகபட்சமாக 6,573 பேர் 100-க்கு 100 மதிப்பெண் பெற்றுள்ளனர். வணிகவியலில் – 5,678 பேரும், கணினி அறிவியலில் – 4,618, கணினி பயன்பாடுகளில் -4,051 பேரும் 100-க்கு 100 மதிப்பெண் பெற்றுள்ளனர். இயற்பியல் – 812, வேதியியல் – 3,909, உயிரியல் – 1,494, கணிதம் – 690, தாவரவியல் 340, விலங்கியல் 154 பேர் முழு மதிப்பெண் பெற்றுள்ளனர். பொருளியலில் -1,760 பேரும் வணிகக் கணிதம் மற்றும் புள்ளியியலில் -1,334 பேரும் முழு மதிப்பெண் பெற்றுள்ளனர்.
